Nagluntad ang isa ka mainit nga tensyon sa pag-umpisa sang Miss Universe 2025 sa Thailand matapos nga nag-angkon sang mainit nga pagbayluhanay sang tinaga sa tunga ni Nawat Itsaragrisil, direktor sang Miss Universe Thailand kag Executive Director sang Miss Universe Organization, kag ni Miss Universe Mexico, Fatima Bosch.
Nag-umpisa ang pagsabtanay antes ang Sashing Ceremony sang ginmensyunar ni Nawat ang isyu sang mga kandidata nga wala nag-intra sa promo activities kag sa sponsor nga ginapahayag konektado sa online casino. Gintawag niya si Fatima agud mag-esplikar, apang nagresulta ini sa gamo matapos nga gintawag ni Nawat nga “dumb” ang mga nagsunod sa mandu sang ila nga national director.
Apang, nagprotesta si Fatima kag ginsiling kay Nawat nga wala sini ginarespeto ang iya nga pagkababaye kabangdanan sang pagpahalin sa iya ni Nawat sa venue. Bangud sini, naglakat man si reigning Miss Universe Victoria Kjaer Theilvig kag pila pa ka mga kandidata.
Sa social media post ni Victoria, ginpahayag niya nga ang matuod nga women empowerment amo ang pagpakigbato kag pagproteher sa dignidad sang kada isa.
Nahibaluan nga nakaiskedyul sa gihapon ang coronation night sang Miss Universe 2025 sa Nobyembre 21, kun sa diin ginalauman nga makuha ni Ahtisa Manalo sang Pilipinas ang ikalima nga korona sang pungsod.
