Na-intercept sang Israeli Air Force ang tatlo ka missiles nga ginlunsar sang mga rebelde nga Houthi sa Yemen kag Gaza sang Martes sang gab-i, Hulyo 1.
Nagtunog ang mga sirena kag ang mga awtoridad sang Israel nagpadala sang isa pa ka mensahe sang alerto sa mga pumuluyo agud paandaman sila sang nagasulod nga mga misil kag magpasilong sa mga bomb shelter ukon mamad.
Ang mga sirena nagtunog sa nagkalainlain nga bahin sang Israel lakip ang balaan nga duta sang Jerusalem, Ben Gurion Airport, Modiin, Rishon Lezion kag pila ka mga puluy-an sa West Bank pagkatapos nga ang mga Houthi naglansar sang isa ka ballistic missile.
Gin-ako sang mga Houthis ang ila responsibilidad sa pag-atake kag nagsiling nga ila ginpuntariya ang airport.
Pagligad sang pila ka tion, nagtunog liwat ang mga sirena sa Gaza envelope, nga nagasakop sang madamo sing pumuluyo nga lugar sang Southern District sang Israel, pagkatapos nga duha ka rocket ang ginpalupok halin sa nabagatnan nga Gaza.
Ginpahayag sang Israeli Defense Forces nga ila na-intercept ang mga rockets kag wala sang may napilasan sa pag-atake. Nagnubo sa minimum ang numero sang mga rockets nga ginpalupok halin sa Gaza matapos ang 20 ka bulan nga inaway sa tunga sang Israel kag Hamas.
Kasunod sang pag-atake sang missile halin sa Yemen, ginpahog sang Israeli Defense Minister nga si Israel Katz ang Yemeni terror group nga ila tratuhon ang Yemen pareho sang Tehran, sa diin atakehon man nila ang mga Houthi sa Yemen pareho sang pag-atake nila sa “ulo sang man-ug” sa Tehran.
Ang US Ambassador sa Israel nga si Mike Huckabee nag-anunsyo man nga ang “B2 bombers” mahimo nga kinahanglan magbisita sa Yemen.
Madumduman nga ang B2 bombers gingamit sang Amerika sa pag-atake sa tatlo ka pasilidad nukleyar sang Iran sa Fordow, Natanz kag Isfahan sang Hunyo 22 sa tuyo nga bungkagon ang programa nukleyar sang Islamic Republic.
