Dakop ang isa ka mister matapos ang ginpatigayon nga buybust operation sang mga katapo sang Criminal Investigation and Detection Group –Capiz sa Sitio Bagongon, Barangay Culasi, Roxas City.
Ang nadakpan amu si alyas Clodin, yara sa legal nga pang-edaron, isa ka tanod kag pumuluyo sang Barangay Dayao, Roxas City.
Sa impormasyon nga nakuha sang Bombo Radyo sa lugar, ginapahayag nga natigayon nga naaresto ang amu nga lalaki pinaagi sa isa ka pulis nga nagpakuno-kuno nga poser-buyer.
Nakuha sa paghinakop sini ang -1 unit sang caliber .45, 2 ka magazines, 14 ka mga bala, 1 ka disposable bag nga nagaduag orange, P16,000 nga buybust money kun sa diin ang P50 sini ang subscribed money, 1 unit sang motorsiklo, kag liyabe.
Samtang, nakatalana naman nga maga-pangatubang sa kaso nga paglapas sa RA 10591 ukon ang Comprehensive Firearms and Ammunition Regulation Act kag kaso sa paglabas sa Comelec Gun Ban.
Sa karon, yara na ini sa paghinakop sang CIDG-Capiz para sa nagakaigo nga disposisyon.
