ROXAS CITY – Natigayon nga mapasakaan sang kaso nga Arson ang mister nga naghungod sunog sa ila nga balay kag naulamid ang duha pa ka kaiping nga balay sa Barangay Cogon, Roxas City.
Ini ang ginkumpirmar ni SFO3 Selvino Ross, Jr., tagpamaba sang BFP-Roxas City, sang mainterview sang Bombo Radyo.
Suno diri, matapos nga gin-aku ni Oliver ‘Dodong’ Casador ang krimen, natigayon ini nga napasakaan sang nasambit nga panumbungon sa piskalya, sang Lunes nga adlaw.
Nagtindog man diri nga complainant ang pamilya man sang suspek, apang kun wala nagdesider ang himata, mahimo man suno diri nga mangin complainant ang katapo sang BFP-Roxas.
Ginpahayag nga non-bailable ukon wala sang ginrekomendar nga piyansa ang korte para sa temporaryo nga kahilwayan sang suspek, para sa kaso nga Arson.
Matandaan nga suno sa suspek, nahimo sini nga sunugon ang ila puloy-an matapos nga duha ka adlaw nga naglakat ang iya live-in partner nga si ‘Pinky’ agud magpamayle sa Sapian.
Sa karon, nagapabilin ini sa karsel sang Roxas City PNP para sa nagakaigo nga disposisyon.
