ROXAS CITY -Natalana nga pasakaan sang patong-patong nga panumbongon ang 36-anyos nga mister nga nagpang-hostage sa tatlo ka mga indibidwal kalakip na ang iya nga bata sa Mejorada Subdivision Barangay Inzo Arnaldo Village, Roxas City.
Ginkilala ang suspek nga si Randy Ric Alipongan, 36-anyos residente sang nasambit nga lugar.
Sa interview sang Bombo Radyo Roxas sa tagpamaba sang Roxas City Police Station nga si Police Master Sergeant Ramel Arcangeles ginpahayag sini nga desidido nga magpasaka sang panumbongon batuk sa suspetsado ang mga biktima nga sanday Enriqueta Batuigas kag Maria Elena Bereber.
Bangud sini, ginapreparar na sang mga kapulisan ang panumbongon nga paglapas sa Batas Pambansa Bilang Anim ukon Ilegal posession of bladed weapon, Alarm and Scandal kag Slight Serious Physical Injury batuk sa suspek nga si Alipongan.
Ginkompirmar man ni Arcangeles nga gin-ako sang suspetsado nga nakagamit ini sang iligal nga droga antes natabo ang insidente.
Nagapati naman ang mga kapulisan nga wala sang kamatuoran ang alegasyon sini, nga may yara sang lima ka mga indibidwal nga tuyo magpatay sa iya, kag tuga gid lamang ini sang iya nga halusinasyon.
Apisar nga naluoy ang mga otoridad sa suspek bangud may yara pa ini sang problema sa pamilya natuhoy sa pagmasakit sang iya nga tiayon, wala sila sang mahimo bangud desisyon ini sang mga biktima.
Matandaan nga nagtuga sang kakugmat sa nasambit nga lugar matapos nga nagwaras kag nagpang-hostage si Alipongan kun sa diin isa diri ang napilasan sa amo nga insidente.
