Mister pilason matapos nga natumba ang motorsiklo nga ginasakyan sa Barangay V, Roxas City

ROXAS CITY-Pilas sa magkatuhay nga porsyon sang kalawasan ang naangkon sang isa ka mister matapos nga naaksidente ang motorsiklo nga ginasakyan sa Rizal Street, Barangay V, Roxas City.

Ginkilala ang biktima nga si Albright Agana residente sang Barangay Banica, sining siyudad.

Sandig sa imbestigasyon sang traffic section sang Roxas City Police Station nagaguwa nga samtang ginasubay sang biktima ang dalan ginaalegar nga may yara sang ginpalid nga sako sang semento sa dalan.

Bangud sini, nadulaan sang kontrol sa manibela ang biktima kag dalayon nga natumba sa dalan.

Gilayon naman nga gindala sa ospital ang biktima kag gindapatan sang nakaigo nga pagbulong.