ROXAS CITY – Wala na sang kabuhi ang isa ka miyembro sang LGBTQ matapos ginluthang-patay sa Barangay Gabuan, Roxas City.
Ginkilala ang biktima kay alyas “Charina”, 30-anyos kag residente sang Brgy. Lawa-an sining syudad.
Base sa nakuha nga impormasyon sang Bombo Radyo nagikan sa Roxas City Police Station, sakay ang nasambit nga biktima sa isa ka trisikol nga ginamaneho ni alyas Rover, 43-anyos, residente sang Brgy Culasi.
Ginpahayag nga nagikan ang biktima sa isa ka mall sa syudad sang Roxas kag nagsakay ini trisikol pakadto kuntani sa Brgy. Dumulog.
Dugang pa sini, may duha ka persona nga nakit-an sa lugar nga sakay sa isa motorsiklo nga nagasunod sa amo nga trisikol. Pag-abot sa highway sang Brgy. Gabuan, hinali nalang nga nakabati na ini ang trisikol driver sang lupok sang wala pa matumod nga armas-luthang.
Suno sa driver, nakabati ini sang apat ka lupok sang armas-luthang.
Bangud sini, nag-angkon sang patal nga pilas ang biktima sa magkatuhay nga parte sang iya lawas kag madasig nga gindala sang Roxas City Emergency Response Team (RCERT) sa malapit nga ospital, apang gindeklarar ini nga dead on arrival sang doktor nga nag-atendir.
Samtang, madasig naman nga nakapalagyo ang mga suspetsado nga sakay sang isa ka motorsiklo.
Sa karon, padayon pa ang imbestigasyon sang mga katapo sang Roxas City PNP angut sa nasambit nga pagpangluthang.
