ROXAS CITY – Igaduso sang mga katapo sang Campaign Against the Return of the Marcoses and Martial Law (CARMMA) sang motion for reconsideration matapos nga ginbasura sang Comelec First Division ang disqualification case batuk sa nagapadalagan sa pagka-presidente nga si Ferdinand ‘Bongbong’ Marcos Jr.
Sa interview sang Bombo Radyo kay Reylan Vergara, Secretary General sang Panay Alliance Karapatan nga maga-file sa Lunes nga adlaw ang legal counsel sang CARMMA sang motion for reconsideration sa Comelec.
Dugang pa sini nga nagapangasubo ang grupo sang mga petitioners matapos ang desisyon nga ginbasura ang petisyon bangud sa lack of merit kag nakit-an nga wala sang crime of moral turpitude sa dampig ni Marcos.
Apang, wala naman nadulaan sang paglaum si Vergara bangud suno sa iya kung indi pagbatunon sang Comelec ang ila nga petisyon magadangop sila sa Supreme Court bitbit ang mga ebidensya nga nagapamatuod nga wala nagbayad si Marcos sang Income Tax Return (ITR) sa tuig 1982 tubtob 1985 kag ini ang convicted sang RTC kag Court of Appeals kag dapat lang nga indi pagtugutan sa pagpadalagan sa pinakamataas nga posisyon sa palaabuton nga eleksyon.
Ang nasambit nga mga ebidensya amo ang Certifications nga nagikan sa Regional Trial Court kag Bureau of Internal Revenue (BIR).
