Gin-anunsyo sang junta government sang Myanmar sang Sabado ang ila paghilway sa halos 6,000 ka mga priso bilang kabahin sang tuigan nga amnestiya sa pagmarka sang independence day sang pungsod, nga nagamarka sang 77 ka tuig humalin sang nakaangkon sang kahilwayan ang Myanmar gikan sa Britanya.
Ang mga ginhilway nagalakip sang kapin sa 180 ka mga dumuluong, apang wala gintumod sang junta ang mga panumbungon batok sa ila ukon sa ila mga nasyonalidad. Ang paghilway ginlaragway bilang isa ka ‘makatawo kag maluluy-on’ nga tikang, kag ang mga pagnubo sang sentensya ginhatag man sa 144 ka mga tawo nga ginpamatbatan sang kabuhi nga pagkabilanggo, nga nagbuhin sang ila mga sentensya sa 15 ka tuig lamang.
Ini nga amnestiya ginpatuman sa tunga sang nagapadayon nga kinagamo sa Myanmar halin sang natabo ang isa ka kudeta militar sang Pebrero 2021, nga nagpahalin sa demokratiko nga gobyerno ni Aung San Suu Kyi kag nagtuga sang lapnag nga mga protesta, pagpamigos, kag kasingki.
Linibo ka mga bilanggo pulitikal, lakip ang mga aktibista kag mga nagaprotesta, ang gin-aresto sa idalom sang pagpugong sang junta sa mga nagapamatok sa ila pagginahum. Ang paghilway sa mga bilanggo isa ka kinaandan nga tikang sa Myanmar, nga masami ginaangot sa pungsudnon nga mga kapiestahan ukon mga selebrasyon sang mga Budhista.
