Nagpatigayon sang house to house campaign kontra dengue ang Barangay Health Workers upod ang mga barangay officials sa pila ka mga kabarangayan sa banwa sang Sapian.
Sa impormasyon nga nakuha sang Bombo Radyo kay Miss Denna Dela Cruz, BHW President sang Brgy. Agtatacay Sur, Sapian, ini ang rekomendasyon sang Capiz Provincial Health Office nga maglibot kag maghatag sang pahanumdom sa mga pumuluyo sa nasambit nga barangay sang mga dapat mahibaluan angut sa balatin nga dengue.
Ginalauman man nga pinaagi sa amo nga aktibidades mapabilin sa gihapon nga mangin zero ang kaso sang dengue sa amo nga barangay.
Luyag man nga maipaabot sa mga pumuluyo nga ginahatagan sang hugot nga pagtalupangod saang gobyerno probinsyal ang kampanya sini batuk sa nasambit nga balatian.
Mahibaluan nga my pila naman ka clustered cases sang dengue sa pila ka mga kabarangayan sa banwa sang Sapian.
Samtang sa karon, yara na sa kapin 1,783 ang kabug-usan nga nabalhag sang balatian nga dengue sa probinsya sang Capiz kag apat sa mga ini ang napatay.
