ROXAS CITY – Ginakabig nga vandalism sang consultant sang sports and business affairs office ang pagpinta sang daku nga laragway ni Senator Manny Pacquiao sa nalikod nga bahin sang pader sang Villareal Stadium sa Roxas City, bangud wala naglisensiya naglisensiya sa gobyerno ang nagpanguna sa pagpinta diri.
Sa exclusive interview sang Bombo Radyo Roxas kay Mrs. Carmen ‘’Baby’’ Andrade, ginpahayag sini nga pa-imbestigahan sini kun sin-o ang tatlo ka mga lalaki nga ginasiling nakita sang pila ka mga nakasaksi nga nagpinta sang laragway ni Pacquiao, para mapasabat sila sa ila ginhimo nga wala pagpangayo sang permiso sa gobyerno.
Suno kay Andrade nga indi basta na lamang pahanugutan ang sin-o nga magpinta sang ila nga gustuhon, bangud magaguwa nga wala na sila sang displina.
Ginpahanumdum man ni Andrade nga ginapanag-iyahan sang gobyerno probinsiyal ang Villareal stadium gani dapat lamang nga mga Capizeño athletes ang ila ipinta kag indi ang laragway ni Pacquiao nga indi isa ka capizeño.
Ginpanginwala man sang nasambit nga consultant nga may lamud pamulitika ang iya reklamo bangud gin-indorso ni Pacquiao ang kandidatura ni Governor elect Esteban Evan Nonoy Contreras sang nagligad nga eleksyon nga kilala nga kasumpong sa gobernatorial position ni outgoing Governor Antonio del Rosario nga utod ni Mrs. Andrade
