ROXAS CITY – Natalana nga ipaidalom sa eksaminasyon sang Philippine National Police (PNP) Crime Laboratory ang narekober nga pila ka mga containers sang mga kemikal nga ginaalegar ginagamit sa pagluto sang shabu sa isa ka bakante nga lote sa Barangay Tiza, Roxas City.
Ini ang ginpahayag ni Police Master Sergeant Mary Elizabeth Balgos sang Roxas City Police Station sang mainterview sang Bombo Radyo Roxas.
Suno kay Balgos, nagapadayon sa karon ang imbestigasyon sang mga kapulisan sa nakit-an nga mga kemikal nga ginbilin sa bakante nga lote nga kaingod sang ginarentahan nga apartment ni Racel Dichosa.
Ang nasambit nga mga kemikal ang ginalakipan sang pioric acid, ammonium sulfate, sodium carbonate, sodium bisulfate, dextrin, ethanol, manganeus carbonate powder, sodium hydroxide, dextrose monohydrate, urea, calcium oxide, coffer sulfate, hydrocloric acid, calcium sulfate kag formalin.
Ginpahayag naman ni Mr. Crispin Tambal, tag-iya sang ginaparentahan nga apartment nga nagrenta si Dichosa sadtong bulan sang Nobyembre kun sa diin nagpakilala ini nga kontratista sang mga kemikal nga ginagamit sa mga school laboratory.
Apang madugay na nga panahon nga wala ini nakapakita gani agud mapuslan ang apartment kag maparentahan ini sa iban, nagpangayo sang pahanugot ang tag-iya sa mga barangay officials para mabuksan ini.
Diri kag nakibot ang tag-iya sang iya nakit-an ang madamo nga container kag bangud naalarma, ginpakamaayo sini nga magpanawag kag magpangayo sang responde sa mga otoridad.
