Ginapaidalom na karon sa forensic analysis nga magadugay sang anom tubtob walo ka semana ang narekober nga submarine drone sa kadagatan sang San Pascual, Masbate.
Suno kay Philippine Navy spokesperson for the West Philippine Sea Rear Admiral Roy Vincent Trinidad, nakuha ang submarine nga yara sa non-operational status.
May duag ini nga yellow, red, kag orange nga kinaandan suno diri nga ginagamit sa scientific purposes. May kalabaon ini nga 3.5 meters, 24 cm in diameter kag may kabug-aton nga 94 kilos.
Suno pa kay Trinidad, ang mga kasubong nga equipment ang ginagamit sa pagkalap sang bathymetric data kasubong sang water temperature, water depth kag salinity.
Sa inisyal nga pagpangusisa, commercial designed kag nagaguwa man nga ginlunsyar ini sang isa ka mother ship.
Base man sa open source, China ang manufacturer apang suno sa PH Navy, kinahanglan pa sang hard scientific evidence agud masiling kun sa diin gid ini naghalin.
Suno pa diri nga indi ini ang una nga kahigayunan nga nakarekober sang amu nga sahi sang equipment sa Exclusive Economic Zone (EEZ) sang Pilipinas.
Suno kay Trinidad masami nga nakarekober sang mga kasubong nga equipment sa northern islands kag eastern seaboard.
Ginpunto man sang Armed Forces of the Philippines (AFP), nga ginakabig nila ini nga seryoso nga butang kag magapadayon ang mga ini nga himuon ang ila mandato nga siguruhon nga luwas ang teritoryo sang Pilipinas.
