ROXAS CITY, CAPIZ- Nagpanugyan ang pamunuan sang National Bureau of Investigation (NBI) Capiz nga mag-aligmat ang publiko agud malikawan ang pagkalat sang online scams.
Sa interview sang Bombo Radyo kay Agent John Katipunan, Executive Officer sang NBI-Capiz, iya ginpahayag nga 80 porsyento sang mga reklamo nga ila narekord may kaangtanan sa Cybercrime, nga nagalakip sang mga modus sa online scam.
Suno kay Katipunan, dako ang epekto sang mga scam nga nagapangbiktima online, kag ang mga pinakasikat nga modus amo ang One Time Pin (OTP), Dugo-dugo, Task, Fishing, kag Love Scam. Ang mga biktima, suno pa kay Katipunan, masami nga may mga bank accounts kag ang OTP scam masami nga naga-take advantage sa mga biktima sa kaaganhon.
Isa sa mga pinakamasami nga modus amo ang OTP scam, sa diin amo ang pagpanawag sang mga scammer nga nagapangayo sang personal nga impormasyon sang biktima, labi na ang bank account details, kag nagahatag sang false promises para ma-engganyo ang biktima.
Isa pa nga modus ang Dugo-dugo, kun sa diin ang scammer nagapanawag kag nagapanghatag sang balita nga may nagluntad nga emerhensya sa pamilya sang biktima, kag nagapangayo sang kwarta para sa pagpabulong.
Samtang, ang Love Scam naman, target ang mga katigulangan, partikular ang mga retirado nga nagapangita sang kahagugma sa social media. Nagagamit ang mga scammer sang lain-lain nga identidad kag nagapang-engganyo nga magpadala sang kwarta ukon allowance.
Ginpasiguro ni Katipunan nga ang publiko kinahanglan magbantay kag mag-verify sang mga tawag nga nagahalin sa mga estranghero ukon mga numero nga wala sila kabalo.
Dugang pa sini, ang NBI-Capiz nagahingyo sa tanan nga mangin alerto, i-verify ang mga mensahe kag tawag, kag likawan ang magpadala sang kwarta sa mga indi kakilala.
In an interview with Bombo Sunnie Mae Constantino Batencila
