Negosyante ginhold-up, P300-K nga cash gindala palagyo sang mga hold-up men

ROXAS CITY – Isa ka negosyante ang ginhold-up samtang nagapauli na sa ila balay sa Barangay Padios, Sara, Iloilo.

Ginkilala ang biktima nga si Sandra Delariarte 42-anyos kag tag-iya sang isa ka tindahan sa Sara wet market.

Nagsakay sa tricycle ang biktima dala ang cash nga nagalab-ot sa P300,000 sa iya nga sling bag sang hinali may nag-overtake nga motorsiklo sakay ang duha ka mga kalalakinhan.

Kasunod sini ang pagtutuk sang armas sang suspek sa driver sang tricycle rason para mag-untat na lamang ini sa kahadluk nga patyon.

Matapos makapalapit sa biktima, hinali sini nga ginsabnit ang sling bag kasunod ang pagpaharurot sa motorsiklo.