ROXAS CITY – Liwat nga nagbalik ang pagpamakal sang palay sa mga mangunguma sang National Food Authority sa probinsya sang Capiz.
Ini ang ginkumpirmar ni Ms. Glenda Paz, Branch Manager sang NFA- Capiz sang mainterview sang Bombo Radyo.
Suno diri nga liwat nga nagpamakal sang palay ang ila talatapan subong nga bulan sang Pebrero matapos nag-untat ang ila operasyon sang bulan sang Enero sini nga tuig.
Dugang pa sini nga magapabilin sa P19.00 kada kilo ang baklanay sang palay.
Sarang nga makapadulong ang isa ka indibidwal nga mangunguma kag makabaligya sang kapin 700 ka sako sang palay apang nagakadapat nga siguruhon lang sang mga ini nga rehistrado sila sa Registry System for Basic Sectors in Agriculture (RSBSA) sang Department of Agriculture (DA).
Nagabaton man suno diri sang “walk-ins” ang NFA-Capiz apang maka-isa lang ka beses ginapahanugutan kag limitado lang sa 200 ka sako sang humay ang sarang nga mabaligya.
Ginpasiguro sang nasambit nga talatapan nga bastante ang suplay sang palay sa probinsiya kun sa diin 275,000 ka sako sang mga palay ang nakapondo sa amo nga talatapan.
