ROXAS CITY-Magahimo sang tikang ang National Food Authority (NFA – Capiz) agud indi na makatuga sang trapiko sa National Highway sang Barangay Bolo, Roxas City ang mga naka-park nga mga trucks nga nagabaligya sang palay sa nasambit nga ahensiya.
Sa interview sang Bombo Radyo Roxas kay Ms. Heriel Jumagbas, Information Officer sang NFA – Capiz nga nagpakig-angut na sa ila ang mga katapo sang Highway Patrol Group – Capiz kag nagrekomendar sang parking area para sa mga trucks nga nagapadulong sa nasambit nga ahensiya agud magbaligya sang palay.
Aminado man si Jumagbas nga ang truck nga aksidente nga na-sidewipe ni Rogelio Deviente sang Barangay Li-ong sining syudad ang timprano na nga nagpark sa kilid sang dalan agud magbaligya sang palay sa NFA.
Suno kay Jumagbas nga pagaistriktuhon nila sini ang pagpahamtang sang mga early warning devices kag indi pagpalab-uton sa 24 oras nga naka-park ang mga truck sa kilid sang karsada.
