ROXAS CITY -Ginpapasar sa ginpatigayon nga special session sang sanggguniang panlungsod ang ordinansa nga nagaregulate sa pagbiyahe sang mga tricycle sa syudad kasunod sang pagpaidalum sa probinsiya sa General Community Quarantine.
Ginpahayag ni City Councilor Albert Gregory Potato, chairman sang Committee on Transportation and Public Utilities nga sa idalum sang ordinansa, igapatuman ang number coding scheme agud malimitan ang numero sang mga tricycle nga magabiyahe sa syudad.
Suno kay Potato ang mga tricycle nga ang city number nagtapos sa 1-2 magabiyahe kada lunes nga adlaw, 3-4 martes, 5-6 miyerkules,7-8 huwebes kag 9-0 kada biyernes nga adlaw.
Samtang pagatungaon sang mga tricycle drivers ang apat ka mga sabado kag dominggo sa isa ka bulan agud mapasiguro nga patas ang pagbiyahe sang mga tricycle sang syudad.
Samtang hugot nga ipatuman ang social distancing sa mga nagabiyahe nga mga tricycle sa syudad.
Suno kay Potato nga isa lamang ka pasahero ang pasugtan nga masakay sa tricycle kag kinahanglan lamang nga magsuksuk sang facemask ang tricycle driver kag pasahero.
