Nagnubo ang numero sang mga Pilipino nga wala sang trabaho sa pungsod sa pagtakop sang 2024.
Sa isa ka press conference, ginsiling ni Philippine Statistics Authority (PSA) chief kag National statistician Dennis Mapa nga nagtakop ang 2024 nga may 1.63-M nga mga Pilipino ang wala sang trabaho sadtong tinalikdan nga tuig kung sa diin kabaylo sang 3.1% nga unemployment rate.
Suno diri, mas manubo ini sa napagkit nga 1.66-M nga mga Pilipino ang wala sang trabaho sadtong Nobyembre 2024.
Buot silingon, yara na sa 34,000 nga mga Pilipino ang nakakita sang trabaho sa nasambit nga period.
Gin-anggid naman sang PSA chief ang pagnubo sang numero sang mga wala sang trabaho sa seasonal increase sa demand para sa mga empleyado bangud sa holidays sadtong Disyembre.
Sa bilog nga tuig sang 2024, naglab-ot sa 1.94-M ang ginabulubanta nga numero sang mga Pilipino nga wala sang trabaho, nagnubo ini nagikan sa 2.19-M nga napagkit sadtong 2023 ukon kabaylo sang 3.8% year-on-year unemployment rate kag ini naman ang ginakabig nga pinakamanubo nga unemployment rate sumugod sadtong 2005.
Samtang, nagtaas naman sa 50.19-M nga mga Pilipino ang may trabaho sadtong Disyembre 2024 ukon kabaylo sang 96.9% employment rate.
Sa nasambit man nga tuig, nagtaas ang numero sang mga may trabaho kung sa diin ginabulubanta yara sa 48.85-M ukon kabaylo sang 96.2% year-on-year employment rate.
Pag-abot naman sa numero sang mga underemployed, nagdangat ini sa 5.48-M nga nagikan sa 50.19- M nga employed individuals sadtong Disyembre samtang sa bilog nga 2024 yara sa ginabulubanta 5.8-M ang mga underempoyed individuals.
Samtang, sa isa naman ka pahayag ginsiling ni National Economic Development Authority (NEDA) Secretary Arsenio Balisacan, nga nagapakita ang panibag-o nga datos sang underemployed sa pungsod nga pag-ayo sang kalidad sang trabaho kag mas magamay nga mga empleyado ang nagapangita sang extra nga trabaho.
