ROXAS CITY – Nagparekord sa Roxas City Police Station ang isa ka nurse matapos nga ginaalegar ginpakitaan ini sang indi maayo nga pamatasan sang isa ka pulis sang ini ang ginpatawag sa Capiz Police Provincial Office agud hinalaan ang iya ginareklamo.
Ang tagreklamo ang ginkilala nga si Christine Senador, 49 anyos kag residente sang Barangay Lanot, Roxas City samtang ang ginareklamo sini amo si Police Executive Master Sergeant Ronnie Umiten sang banwa sang Ivisan.
Base sa ginpabalhag ni Senador nga nagpadulong ini sa talatapan sang CPPO agud magpakig-estorya kay Umiten matapos nga nagpanawag ang amo nga pulis sa kapitan sang Barangay Balaring, Ivisan nga ginapauntat ang pagpautod sang kahoy sa duta sang tagreklamo.
Gindugang pa sang tagreklamo nga may nagpanawag pa nga pulis sa talatapan sang Philippine Coconut Authority natuhoy man sa amo nga butang.
Diri ginpakamaayo ni Senador nga pakig-angutan si Umiten agud klaruhon ang pagpakanselar sini sang iya permit.
Apang sa baylo nga magpakig-estorya sang matawhay, ginaalegar ni Senador nga indi maayo ang ginpakita nga batasan ni Umiten sa ila pagsapol.
Suno diri nga nangin agresibo ang nasambit nga pulis samtang ginadepensahan ang iya kaugalingon.
Bangud diri, ginpakamaayo na lamang ni Senador nga iparekord sa pulisya ang natabo.
