Nagpanawagan ang Office of Civil Defense sa publiko nga magpabilin nga alerto kag maghanda para sa manugsulod naman nga storm system “Uwan,” nga nagapaandam sa epekto sini sa Pilipinas pila lamang ka adlaw matapos mag-igo ang bagyo Tino sa pila ka bahin sang Visayas.
Ginpaandaman ni OCD Undersecretary Harold Cabreros ang mga pumuluyo nga ang weather disturbance, suno sa PAGASA ang mahimo nga magbaskog sa Super Typhoon kag posible mabatyagan ang malain nga tyempo bwas nga adlaw sang Sabado.
Suno kay Cabreros, ang kalapadon sang bagyo ang yara sa 1,000 kilometers nga nagapatimaan sang seryoso nga risgo nga may dala nga mamunog nga ulan kag mabaskog nga hangin.
Ang 1,000 kilometers nga kalapadon ang katumbas sang air distance sa tunga sang Soccsksargen kag Manila.
Buot silingon, ang mga rehiyon nga indi malabayan sang bagyo Uwan ang mahimo man nga maka-eksperyensya sang severe weather conditions.
Ginalantaw nga ang bagyo ang posible mag-igo sa Northern kag Central Luzon kag ginaabisohan gid ang mga residente nga magpreparar sang timprano samtang ang mga yara naman sa Metro Manila, Southern Luzon, kag iban pa nga rehiyon ang ginaabisohan man nga magpabilin nga vigilant samtang nagapalapit sa Pilipinas ang storm system.
Ginpahanumdom man sang natungdan ang importansya sang pagsunod sa official government advisories kag mangin updated sa weather bulletins kag emergency instructions agud mapabilin ang safety sa pihak sang potential impact sang bagyo.
