ROXAS CITY – Nagpanawagan karon ang isa ka Capizeña OFW sa kasubong sini nga nagatrabaho sa Hong Kong nga mag-aligmat sa ila palibot kag likawan ang pagsuksok sang kolor sang mga bayo nga nagasimbolo sang rebelyon kag kamatayon.
Ginlaragway sa karon ni Ms. Lee ang Hong Kong nga yara sa limbo kag nagakinagula bangud sa padayon nga hublag protesta batuk sa kontrobersiyal nga extradition bill.
Suno kay Lee nga apektado ang tanan sa Hong Kong, indi lamang ang mga ordinaryo nga mga tawo kundi mangin mga negosyante kun mangin isa na ini ka laye.
Nagpahanumdum man ini sa mga OFWs nga likawan ang mga lugar sa diin ginapatigayon ang mga hublag protesta kag likawan ang pagsuksok sang nagaduag puti kag yellow nga bayo sa diin nagasimbolo ini sang kamatayan kag rebelyon.
Pananglitan nga makita nga nagasuksok sila sang ginadumilian nga kolor sang bayo posible sila nga dakpon ukon ipaidalum sa interogasyon kag ang pinakamalala nga ila madangtan amo ang pagtabog sa ila paguwa sa Hong Kong
Mas maayo nga magsuksok na lamang sila sang nagaduag asul ukon pink nga bayo para safe.
Nag-apelar man ini sa mga Pilipino sa Pilipinas nga updan sila sa pagpangamuyo para sa ila nga kaluwasan kag para matapos na ang kinagamo.
