ROXAS CITY – Nagaguwa sa imbestigasyon sang Bureau of Fire Protection (BFP)-Panit-an nga ginhungod nga sunugon ang opisina sang isa ka gasolinahan matapos nga ginkawatan sa Barangay Salocon, Panit-an, Capiz.
Ini ang ginkumpirmar ni SFO3 Ramel Arquisola, Municipal Fire Marshal sang Panit-an Fire Station, sang Bombo Radyo posible suno diri nga may ideya ang wala matumod nga suspek sa trabaho sa gasonilahan bangud nakahibalo ini sa ginakahamtanagan sang switch sang dispenser nga ginagamit sa pagtughong sang gasolina, matapos nga ginkwaan sini sang masobra apat ka litro nga posible amu ang gingamit sa pagsuga agud masunog ang opisina.
Suno kay Arquisola nataban sang suspek ang ginabulubanta nga P5,000 cash nga yara sa drawer kag wala sini nadiparahan ang isa ka brown envelope nga may unod man nga cash.
Pahayag ni Arquisola nga una nga ginkakas ang monitor sang CCTV antes sunugon ang opisina.
Mahibaluan nga monitor lamang ang rekober sang mga otoridad nga ginhaboy sa fishpong kag nagapabilin nga missing ang recorder.
Nagapati man ang opisyal nga indi magnubo sa duha ang suspek sa pagsunog kag pagkawat sa opisina sang gasolinahan.
Ginabulubanta P45,000 ang nangin kahalitan sang amu nga insidente kag nagapadayon ang imbestigasyon.
