ROXAS CITY – Posible nga indi pagbatunon ang resignation sang opisyal sang gobyerno nga luyag magbiya sa trabaho kun may matukiban nga anomaliya sa iya pagpungko ukon termino.
Ini ang ginpahayag ni Rufino Leonoras, Field Office Director sang Civil Service Commision Capiz sang mapakig-angutan sang Bombo Radyo.
Suno diri, antes tugutan ang opisyal ukon empleyado nga magbiya, kinahanglan sini magsumiter sang nagakaigo nga clearances agud mapamatud-an nga malimpyo ang iya pagpanabraho.
Apang, kun madiskubrehan nga may anomaliya sa iya pagpungko, indi pagbatunon sang agency head ang resignation sini, samtang kun nakabiya na ini kag ulihi na natukiban ang anomaliya, mahimo ini kasuhan sang ahensya nga iya gintrabahuan apang mahulog na ang kaso sini sa criminal case kun sa diin korte na ang magahawid.
Ginpaathag man ni Leonoras nga mandatoryo sa ila nga batunon ang resignation sang isa ka opisyal ukon empleyado bangud personal nila ini nga desisyon kag kinahanglon respetuhon mapapribado man ukon pampubliko nga ahensya.
Kun luyag naman sa liwat sang empleyado mag-apply sa LGU ukon iban pa nga ahensya, magapasa ini liwat sang resikitos kag kun may kaso angut sa iya nakaligad nga trabaho, magadepende naman ini sa agency head kun ila batunon bangud sila man ang maga-antos ukon magabenepisyo.
Ginapalab-ot man sang direktor nga kun may reklamo natuhoy sa gobyerno ukon nagatrabaho sa pampubliko nga ahensya bukas ang ila talatapan nga mag-asister.
