Nagapadayon na sa House of representatives ang imbestigasyon angut sa ginaalegar maanomaliya nga pagbakal sang Mobile Primary Care Facilities (MPCF) sang Department of Health (DOH) matapos ini ang pormal nga ginsuportahan sang National Unity Party (NUP).
Ginbaton sang National Unity Party ang panawagan ni Quezon City 3rd District Rep.Franz Pumaren nga ipaidalum sa legislative inquiry ang amo nga ahensya.
Katuyuan sang ginaduso nga hearing nga pabaskugon ang procurement system, oversight, kag aktwal nga implementasyon sang bilyon-bilyon nga programa sang departamento.
Ginhatagan pagtamod ni NUP Chairperson kag Deputy Speaker Ronaldo Puno nga indi dapat pagbalewalaon ang nasambit nga isyu kag dapat ini nga imbestigaran bangud ang kwarta nga gingamitdiri ang gikan sa buwis sang pumuluyo.
Suno kay Puno, magalab-ot sa P1.8 billion ang pundo sang publiko nga gintalana para sa proyekto, gani hugot nila nga gina-obligar ang pamunuan sang DOH nga maghatag sang klaro kag detalyado nga paathag.
Nahibaluan nga nag-ugat ang aksyon sang mga mamalidha matapos pormal nga ginpasakaan sang pormal nga reklamo sa Office of the Ombudsman ang pila ka matag-as nga opisyal sang DOH.
Lakip sa nagapanguna nga ginreklamo si Health Secretary Teodoro Herbosa, nga karon implikado sa isyu sang ginaalegar bid rigging kag iban pa nga iregularidad sa kabug-usan nga procurement process sang nasambit nga mga mobile clinics.
