ROXAS CITY – Ginkumpirma ni Provincial Administrator Dr. Edwin Monares nga mas o menus sa P1 million ang mangin kagastuhanan sang gobyerno sa pagpadulong sa Davao City para sa Strategic Planning seminar kag Executive Legislative Agenda.
Apang ginklaro sini ang nasambit nga kantidad naka-program na sa pondo sang tagsa ka departmento kag gamiton na lamang.
Suno kay Monares nga kapin sa 70 ka mga delegado ang magaupod sa nasambit nga aktibidad kag duha sa tagsa ka departamento nga ginalakipan sang mga department heads kag administrative officer.
Samtang ginpanginwala sini ang report nga lakip sa ila itinerary ang Samal Island.
Liwat ginpanindugan ni Monares nga kaayuhan sang probinsiya sa diin makabenepisyo ang mga Capizeno ang nagapanguna nga rason sang aktibidad.
Gintuad pa sini nga mahimo man nga diri patigayunon ang strategic planning apang, kinahanglan nila sa gihapon nga magrenta sang daku nga lugar sa diin ma-akomodar ang tanan nga delegado.
