ROXAS CITY – Nagapati ang manugbaligya sang bugas sa Teodoro Arcenas Trade Center (TATC) nga imposible sa karon nga tinion nga mangin P20 ang kada kilo sang bugas sa merkado.
Sa pagpakig-angut sang Bombo Radyo kay Dolores Gantala, dekada na nga nagabaligya sang bugas, suno diri nga bangud sa pagtinaas sa presyo sang produktong petrolyo, ka-imposible pa nga matabo ang pagbarato sa presyo sang bugas.
Apang, kun mag-abot gid man ang tion nga magabarato ang abono kag iban pa nga kinahanglanon sa pagpanguma, posible nga matabo na ang P20 kada kilo sang bugas.
Sa karon, ang pinakabarato nga bugas sa ila amu ang ‘laon’ ukon ba’hay nga nagabalor sa P34, samtang ang pinakamahal nagalab-ot sa P60 sa imported rice kag P75 sa black rice.
Nagdangat man sa P1,700 ang kada sako sang ba’hay, P1,918 sa super white kag P2,100 ang kada sako sang Jasmin kag Princess Bea nga sahi sang imported nga bugas.
