Ginaduso sang Chamber of Representatives nga gamiton ang binilyon ka pesos nga kita gikan sa Malampaya Deep Water Gas-to-Power Project para sa pagtukod sang estratehiko nga reserba sang gatong agud nga maproteheran ang pungsod batuk sa nagabag-o-bag-o nga presyo sang langis kag hinali nga kakulang sang suplay.
Suno kay House Minority Leader Marcelino Libanan, nagakadapat nga gamiton sang gobyerno ang nakolekta nga royalties gikan sa proyekto agud ma-finance ang pagtukod sang coastal petroleum storage facilities sa idalum sang Philippine National Oil Company (PNOC).Philippine Travel Guide
Base sa pinakaulihi nga datos gikan sa Budget of Expenditures and Sources of Financing (BESF), ang pondo sang gobyerno nga nakolekta gikan sa Malampaya halin 2014 tubtob 2024 naglab-ot sa ₱200 bilyones.
Katumbas ini sa ₱18.2 billion nga kinaandan nga kita kada tuig.
Paathag pa ni Libanan, ginalauman nga mas daku pa gid ang magasulod nga pondo sa public treasury sa masunod nga mga tinuig kasunod sang madinalag-on nga pag-drill sang duha ka bag-o nga gas wells sa nasambit nga pasilidad.
Nagpanindugan ang mamalidha nga dapat gamiton lang ang nakolekta nga royalties ang gintalana para sa energy development, para sa pagpabaskog sang fuel storage capacity sang Pilipinas.
Ini nga proposal nagasakop sang pagtipig sang mayor nga mga produkto sang petrolyo, lakip ang diesel, gasolina, kag gatong sa eroplano.
Paagi sa sini nga tikang, tuyo sang mamalidha nga masiguro nga ang pungsod may yara sang nagakaigo kag handa nga suplay sa tion sang krisis sa enerhiya ukon hinali nga pagtaas sang presyo sa internasyonal nga merkado.
