Ginpatuman sang Bangko Sentral ng Pilipinas (BSP) ang P500,000 daily limit para sa cash withdrawals agud matapna ang money laundering.
Sa pinakaulihi nga circular sang BSP, nakasaad nga ang withdrawals sang masobra P500,000 ang mahimo lamang nga ipatigayon pamaagi sang check payments, fund transfer, direct credit sa deposit accounts, ukon iban pa nga sahi gamit ang digital payment platform sang bangko.
Ang P500,000 ang mahimo nga i-withdraw sa isa ka single transaction ukon sa sunod-sunod nga transaksiyon sa sulod sang isa ka banking day.
Kinahanglan man nga magpasa sang mga customer sang dugang nga mga dokumento sang identidad ukon pamatuod sang lehitimo nga negosyo antes nga pahanugutan sang BSP ang transaksyon.
Subong man, ang mga bangko ang mahimo nga magpamatbat sang mas manubo nga cash transaction limit base sa internal risk assessment sini ukon sa financial profile sang customer.
