ROXAS CITY – Tinutuyo ni 1Tahanan Party-list Representative Atty. Nathaniel Oducado nga mahatagan sang recognition ukon pagkilala ang mga iloy sa ila pagtatap sa ila mga kabataan kag bana rason nga gin-file sini sa Kamara ang House Bill No. 3141 o “Nanay ng Tahanan Act.”
Sa interview sang Bombo Radyo kay Rep. Oducado, iya ginpahayag nga sa idalom sang hagna, hatagan sang P1,500 nga ayuda kada bulan ang mga pigado nga mga iloy nga wala sang part-time ukon home-based work kag ang nagapanguna nga katungdanan sini amo nga serbehan kag tatapon ang iya anak kag pamilya.
Sakop lamang sang hagna ang mga iloy halin sa pamilya nga yara sa idalom sang poverty threshold.
Nasaad man sa Section 5 ang pila ka mga kondisyon agud mapabilin nga kwalipikado ang mga benepisyaryo, lakip na ang pagpa-enroll sang mga kabataan sa pampubliko nga eskwelahan nga indi magnubo sa 85% ang attendance, pagpakita sang mayo kag responsable nga paminatasan sang bata kag pagtambong sang bilog nga pamilya sa quarterly barangay assembly.
Ang Department of Social Welfare and Development (DSWD) amo ang magapatuman sang programa sa diin ang pondo ang pagahkuhaon sa General Appropriations Act.
