ROXAS CITY – Makabig nga makapaayo ang pag-resign ni VP Sara bilang miyembro sang gabinete ni Presidente Bongbong Marcos Jr. kag ini ang mangin isa ka opposition.
Ini ang ginpahayag ni Atty. Nelson Borja, Criminal Lawyer kag Political Analyst, sang ma-interview sang Bombo Radyo.
Suno kay Atty. Borja nga mas maayo nga mangin isa ka political opposition si VP Sara bangud bilang isa ka democratic country ang Pilipinas may ara dapat sang leading political party kag isa ka political opposition.
Ginpaathag man sini nga kun puro lang political party kag wala sang opposition, makabig nga dictatorship ang isa ka pungsod.
Para kay Atty. Borja, makabenepisyo sa mga Pilipino ang pag-resign ni VP Sara kag mangin isa na ka oposisyon bangud madamo sang isyu nga ginapangatubang ang pungsod kaangay nalang sang isyu sa West PH Sea.
Posible suno diri nga plano ni VP Sara pinaagi sa iya amay nga si anay Presidente Rodrigo Duterte nga makighinala ini sa China agud resolbahon ang isyu sa ginaagawan nga teritoryo.
Mahibaluan nga malapit si Duterte sa China samtang malapit naman ang Marcos administration sa Amerika.
Pahayag pa ni Atty. Borja nga isa pa sa mga posible rason sang pag-resign ni VP Sara bangud kaangay nga wala ini sang boses kun miyembro ini sang gabinete tungod kinahanglan lamang sini nga magsunod sa administrasyon.
Posible man suno diri nga ang pagbiya ni VP Sara ang bangud may mga kaugalingon man ini nga programa kag polisiya para sa ikaayo sang mga Pilipino.
Ginpaanggid ni Atty. Borja si anay VP Leni Robredo nga isa man ka oposisyon nga may kaugalingon nga polisiya kag programa sa administrasyon ni anay Pres. Rodrigo Duterte.
