ROXAS CITY – Wala sang narekord nga ginbaha nga banwa sa probinsya apisar nga ginbubo sang mabaskog nga pag-ulan ang mayor nga kabanwahanan, tuga sang Low Pressure Area (LPA) kahapon nga adlaw tubtob subong.
Ini ang ginpahayag ni Mrs. Judy Grace Pelaez, pinuno sang Provincial Disaster Risk Reduction and Management Office (PDRRMO) sang mainterview sang Bombo Radyo.
Suno diri, ba-se sa monitoring sang nagkalain-lain nga Municipal DRRMO’s, wala sang barangay nga ginabaha sa karon, kag zero incident bangud sa pagbubo sang ulan.
Normal man ang water level sang mga kasubaan kaangay sang Maayon-3.80 meters, Mambusao 2.7 meters, Panit-an-1.69 meters, Pontevedra 4.51 meters kag Sigma-2.64 meters.
Sa karon, ang ginabantayan nga LPA ang nasiplatan sa bisinidad sang Davao de Oro nga amu ang nagadala sang pag-ulan sa Visayas, kag ang isa pa ka LPA ang yara sa guwa sang PAR, sa nasidlangan nga bahin sang Mindanao.
Ginpahayag man sini ang pagpaguwa sang Regional DRRMO sang memorandum may kaangtanan sa pagmonitor sang duha ka ginabantayan nga LPA nga indi malayo mangin isa ka bagyo sa masunod nga mga inadlaw.
