ROXAS CITY – May nangin balasehan ang alkalde sang syudad sa ginhimo nga pagbalasa sa pila ka mga department head sa Roxas City hall.
Ginpahayag ni Mayor Ronnie Dadivas nga ginba-se sini ang pagtransfer sa pila ka mga pinuno sang departamento sa iya nga trust and confidence sa magapamuno sa isa ka talatapan, performance sang department head kag ang kapasidad nga pamunuan ang isa ka departamento.
Suno pa sa alkalde nga luyag man sini nga masiguro, ang magapamuno sa isa ka departamento ang makahatag sang maayo nga serbisyo sa mga pumuluyo.
Sa bahin ni Mrs. Gilda Fernando, anay city budget officer nga gintransfer sa City Treasurer’s Office, nagakaigo man ang ginpahamtangan sa iya nga talatapan, bangud makabulig si Fernando nga masiguro nga may nagakaigo nga pondo ang syudad santu man sa iya expertise.
Gintal-usan si Fernando sang assistant sini nga si Mr. Edgar Alfon.
Kalakip sa gintransfer sa iban nga departamento ang anay head sang Human Resource Management Office nga si Ma. Filipinas Isolan nga karon nagaserbe na lamang nga staff sang amo nga talatapan kag ang concurrent HRMO head amo si Mrs. Marilyn Albaran nga amo man ang head sang City Civil Registrar.
Nagapungko naman karon nga head sang City Licensing Office si Roselyn Estrebilla nga nagtal-us kay Mrs. Sherlita Tumlos nga gintransfer sa City Veterinarian’s Office
Kasunod sini, gintadlong sang alkalde ang nagalapta nga report nga may lamud pamulitika ang reshuffling sang pila ka mga department heads.
Suno kay Dadivas nga tapos na ang eleksyon kag indi isyu kun sin-o ang nagkontra sa iya, bangud may nangin balasehan siya kag luyag masiguro nga ang hepe sang isa ka departamento ang maka-perform sang maayo kag makaserbisyo sa mga pumuluyo sa syudad sang Roxas.
Ginpasalig man sang opisyal nga lainon sini ang kultura nga ginasunod sadto sa city hall agud liwat magbalik ang kumpyansa sang mga pumuluyo sa gobyerno.
