ROXAS CITY – Wala-tuo ang hublag-protesta sang mga pumuluyo sa pila ka mga lugar sa pungsod Sri Lanka bangud sa kakulangan sang suplay sang produktong petrolyo kag nagapanguna nga balaklon bangud sa pagka-pierde sang turismo sa pungsod.
Sa interview sang Bombo Radyo kay Zeny Verdillo Gadut, Bombo International Correspondent kag Adviser sang OFW Sri Lanka Association, suno diri, na-pierde ang industriya sang turismo, nga amo nagahatag sa pungsod sang kita nga dolyar sang sumugod ang COVID-19 pandemic.
Bangud sa kakulangan sa kita sang dolyar, nalimitahan angpagsulod sang suplay sang produktong petrolyo, kun sa din kada-adlaw ma-ekperensyahan sang bug-os Sri Lanka ang power interruption nga naga-dugay sang napulo tubtob 13 ka oras kag mabatyagan ang pagtaas sang kapin 50 porsyento sa mga presyo sang balaklon.
Dugang pa ni Gadut, wala untat ang pagpatigayon sang hublag protesta duwa na ka semana ang nakaligad, bangud luyag sang mga pumuluyo nga papanaugon sa pwesto si President Gotabaya Rajapaksa bangud wala sini natuman ang mga promisa sang ini ang nagapadalagan sa pagka-presidente.
Apang, wala gina-ekspektar sang mga pumuluyo ang paghalin sa pwesto sang mga myembro sang kabinete imbes ang presidente.Suno diri, apisar yara sa hilway nga sitwasyon nahadlok na ini magguwa sa ila puluy-an bangud sa mga nagapatigayon sang hublag-protesta.
Aminado si Gadut, nga may pila na ka mga OFWs ang nagpa-butyag nga maga-biya na sa pungsod kag maga-‘cross country’.
Gina-abisuhan naman sini ang mga kaupdanan nga indi mag-intra sa anuman nga pagprotesta batuk sa gobyerno sang Sri Lanka.
