ROXAS CITY – Posible makahalit sa ikaayong lawas kag makatuga sang kanser ang pagkaon sang kontaminado nga panginhason kag isda dala sang oil spill.
Ini ang ginpahayag ni Dr. Cesar Yap, resident doctor sang mainterview sang Bombo Radyo.
Suno diri, ang sintomas sini ang indi gilayon makit-an, kundi amat-amat lang nga ginasamad ang ikaayong lawas indi kasubong sang sintomas sang red tide nga nagapalanuka.
Pahayag sini, nga tuman nga maapektuhan sang oil spill amu ang mga panginhason bangud wala ini sang ikasarang nga maprotektahan ang ila kaugalingon sa kontaminado nga kalalawran indi kaangay sang isda nga mahimo makalangoy palayo.
Posible man suno diri, nga makaangkon sang skin disease ang isa ka persona kun magpaligo sa apektado nga lugar.
Panugyan sang doktor, nga mag-inom sang bitamina para sa pagpabakud sang immune system kag likawan nga magkaon sang isda kag panginhason nga posible naapektuhan man sang oil spill.
