ROXAS CITY – Ginahulat nalang sa karon ang resolution sa Comelec en banc, agud masuguran ang pagparehistro sa patigayunon nga Barangay kag SK Elections sa Disyembre 5, 2022.
Ini ang ginkumpirmar ni Atty. Wil Arceño, Election Officer, sang mainterview sang Bombo Radyo.
Suno diri, patigayunon sa Hulyo tubtob Nobyembre sini nga tuig ang pagpa-rehistro, kag wala pa sang mandu sa Komisyon sa pagpaiway sang nasambit nga eleksiyon, gani padayon sa karon ang ila ginahimo nga aktibidad.
Ginapahayag nga wala sang pagbag-o sa pagagamiton nga pondo kun pagadayunon ukon ipaiway ang nasambit nga eleksyon, bangud pareho sa gihapon ang gastohanon sang ahensya.
Pangabay sini nga kuntani tempranuhon ang pag-anunsyar sang gobyerno kun iga-postpone ang barangay kag SK Elections, apang kun basehan ang preparasyon, handa na ang Comelec sa pagpatigayon sang eleksiyon.
