ROXAS CITY – Tatlo ka mga indibidwal ang ginatutukan sang mga kapulisan nga posible yara sa likod sang pagpatay sa isa ka Capizeño pulis nga ginluthang kag ginbuno sang riding-in-tandem sa ila nga balay sa Palmera Homes, Caloocan City.
Ini ang ginpahayag ni P/Supt. Erwin Margarejo, anay tigpamaba sang Manila Police District sang mainterview sang Bombo Radyo Roxas.
Una na nga ginkilala ang napatay nga si PO2 Chris Robert Castro, tumandok sang Capiz nga na-assign sa Manila Police District Tondo Police Station 1.
Suno kay Margarejo, ang tatlo ka mga persons of interest nga gina-imbestigahan sang pulisya ang lunsay may kahilabtanan sa ilegal nga droga nga naaresto sa ginpangunahan nga anti-drug operations sang napatay nga si PO2 Castro apang nakahilway sa karsel.
Ginpahayag pa sini nga may kahilabtanan sa trabaho bilang imbestigador ang pagpatay sa nasambit nga pulis bangud nakabaton na ini sang pagpamahog sa iya nga kabuhi gikan sa mga naaresto sini nga mga drug suspek.
Sa ulihi ginpasiguro ni Margarejo nga pagahimuon sang pulisya ang tanan agud mahatagan sang hustisya ang kamatayon sang nasambit nga pulis.
