ROXAS CITY – Ginpamatud-an lamang sang administrasyon nga wala sila sang pagasantuhon nga mga kritiko nga magapakita sang kaisog nga kontrahon ang ila mga plano.
Ini ang nangin pahayag ni Capiz 1st District Congressman Emmanuel ”Tawi” Billones Sr., kasunod sang pagpasaka sang tatlo ka separado nga mga kaso sang DOJ batuk kay Senator Leila de Lima sa Muntinlupa Regional Trial Court may kaangtanan sa iligal nga droga.
Suno pa sa kongresista nga isa ka mensahe lamang ang gusto nga ipalab-ot sang administrasyon nga may indi maayo nga maabtan ang sin-o man nga magakontra sa ila.
Nagapanindugan si Billones nga politically motivated ang nahinabo sa senadora nga kilala nga vocal critic sang Duterte administration.
Gin-ako man sang opisyal nga kalakip sa magnificent 7 sa kongreso nga may kahadluk man ini nga nabatyagan, bangud indi malayo na pangitaan man sila sang buho kag initan sang mayorya.
Samtang magapatigayon sila sang sinapol sang mga kaupdanan nga kalakip sa Magnificent 7 kag estoryahan kun ano ang ila sarang mahimo para mabuligan si Senator Leila de Lima.
