ROXAS CITY-Ginatun-an sang Police Regional Office (PRO-6) ang posible nga pagpasaka sang panumbungon batuk sa lima ka mga narco politician sa Western Visayas nga kalakip sa ginpaguwa nga narco list ni President Rodrigo Duterte, kun mangin positibo ang ila nga monitoring kag operasyon.
Sa interview sang Bombo Radyo Roxas kay Police Superintendent Joem Malong, spokesperson sang PRO-6, ginpahayag sini nga padayon ang monitoring batuk sa lima ka mga pulitiko nga kalakip sa narco list nga ginpaguwa ni President Rodrigo Duterte sang Huwebes sang gab-i.
Kalakip sa mga pulitiko sa Region 6 nga yara sa listahan amo sanday Ariel Tabugo Alagos Jr., bise alkalde sang Culasi, Antique kag nagapadalagan bilang alkalde, Julius Ronald Pacificador, alkalde sang Hamtic, Antique kag nagapadalagan bilang bise alkalde, Mariano Malficio Malones Sr., alkalde sang Maasin, Ilo-Ilo kag nagapadalagan bilang bise alkalde, Siegfredo Afluente Betita sang Carles Iloilo, mayoralty candidate kag si anay Ilo-Ilo Mayor Jed Patrick Mabilog.
Nahibaluan nga ginpasakaan na sang administrative case sang Department of Interior and Local Government (DILG) sa office of the Ombudsman ang 46 ka mga narco politicians nga kalakip sa narco list nga ginpaguwa ni Presidente Duterte sang damlag lang.
