Pagatun-an sang gobyerno, partikular ang regional tripartite wages and productivity board, ang pangabay para sa mas mataas nga sweldo para sa mga mamumugon.
Sa pihak nga bahin, ginpasalig ni Presidente Ferdinand Marcos Jr., nga wala ginabalewala sang gobyerno ang hingyo nga mas mataas ang sweldo.
Ginpasalig man ni Presidente Marcos sa mga mamumugon nga ginapamatian sang gobyerno ang ila mga pangabay kag siguraduhon nga matuman ini.
Apang suno sa Presidente, may mga butang nga dapat timbang-timbangon kon ano ang mangin epekto sang wage increase.
Suno sa Presidente, dapat ikonsiderar ang epekto sini sa pag-uswag sang negosyo, trabaho, kag ekonomiya sang pungsod.
Dugang pa niya, manami pamatian ang mga matam-is nga promisa angut sa wage increase apang kinahanglan nga balansehon.
Ginpabugal man sang Presidente nga 16 ka mga rehiyon ang nagpatuman sang salary increase humalin sang Hunyo sang nagligad nga tuig.
Sa pihak nga bahin, ginpaambit sang Presidente ang nagkalain-lain nga mga programa sang gobyerno agud mabuligan ang aton mga kasimanwa nga mapahagan-hagan ang ila pag-antos, ilabi na sa mga galastuhan.
