ROXAS CITY – Daku ang posibilidad nga may yara sang local transmission nga natabo sa pagpositibo sa COVID-19 sang tatlo ka mga residente sa Sitio Sakop, Barangay Culasi, Roxas City.
Ginpahayag ni City Mayor Ronnie Dadivas nga indi pa mapat-ud kun sa diin nakuha sang tatlo ka mga residente ang virus nga naglaton sa ila apang ginapatihan nga may local transmission bangud lunsay wala sang history of travel gikan sa mga lugar nga may yara sang kaso sang COVID-19 ang tatlo ka mga nagpositibo.
Suno kay Dadivas nga indi malayo nga makakuha sang kaso sang local transmission ang siyudad bangod bukas ang border sang probinsiya sa mga kaiping nga mga kaprobinsiyahan nga may yara sang mataas nga kaso sang nasambit nga balatian.
Samtang ginpasiguro naman ni City Health Officer Dr. Lorry Cahilog nga nagapadayon ang contact tracing sang mga otoridad sa mga naka-close contact sa tatlo ka mga indibwal.
Suno kay Cahilog nga igapaidalom man sa RT-PCR test ang mga indibidwal nga nakaupod sang mga nagpositibo subongman ang mga malapit sa 200 metros nga radius kun sa diin gin-abisohan ang mga ini nga magpaidalom sa home quarantine.
Dugang pa ni Cahilog nga kwestyonable pa kun sa diin nakuha sang tatlo ang amo nga virus apang may posibilidad nga may yara sang asymptomatic nga naglaton sa mga nagpositibo.
