ROXAS CITY – Wala sa gihapon ginapatuman ang pagsuksok sang uniporme sa mga estudyante kag tagsa ka buluthoan sa idalom sang DepEd Capiz Division sa palaabuton nga full face to face classes sa Nobyembre.
Ini ang ginkumpirmar ni Dr. Miguel Mac Aposin, Capiz Schools Division Superintendent, sang ma-interview sang Bombo Radyo.
Apang, hugot sa gihapon ang ila pagpatuman sang minimum health protocols ilabi na ang social distancing.
Rason nga ginakonsiderar man nila ang adjustments sang mga estudyante kun sa diin indi tanan ang madasig mag-adjust tuga sang 2 ka tuig nga wala sang f2f class.
Ginsiling sang doktor nga kinahanglan magbinuligay ang mga ginikanan kag manunudlo sa transition stage kag paggiya sa mga estudyante agud mangin epektibo ang ila pagtuon.
Sa pihak nga bahin, nagtakop naman ang enrollment sang nagsugod ang limited face to face classes apang nagabaton sa gihapon sila sang mga late enrollees.
Apang, may limitisyon ini bangud sa number of school days nga kinahanglan masudlan sang mga estudyante.
Suno sa doktor, nagabulig ang Capiz Division sa pagpreparar sa palaabuton nga Nobyembre kag masiling niya nga handa na ang kadam-an sa mga buluthoan sa probinsya.
