May posibilidad nga magtaas pa ang presyo sang mga balaklon, ilabi na ang mga pagkaon subong nga 2025 bangud sa kulangan sang suplay sa pihak sang mataas nga demand.
Butang nga ginakahangaw-an sang ekonomista nga si Professor Astro Del Castillo bilang sabat sa pahayag nga posible magsaka sa 2.6% ang inflation rate subong nga bulan.
Suno kay Del Castillo, kinahanglan nga siguruhon sang gobyerno nga mapanubo ang presyo sang kuryente nga magaduso naman agud magnubo ang presyo sang mga balaklon, ilabi na sang pagkaon.
Posible man suno diri nga makaapekto sa presyo sang mga balaklon ang opisyal nga pagpungko ni Donald Trump bilang bag-o nga pangulo sang Amerika bangud sa plano sini nga bag-uhon ang mga taripa ukon trade transactions sa nagkalain-lain nga pungsod.
Samtang, ginatudlo naman sang Social Weather Stations ang pagsirit sang inflation nga nagapanguna nga rason sang pagnubo sang Christmas optimism sang pila ka mga Filipino matapos naguha sa survey nga nabuhinan ang numero sang mga Pinoy nga nagsiling masadya ang ila Paskwa sadtong tinalikdan nga tuig.
Ginpunto ni SWS Director for Communications and Information Technology Leo Laroza nga indi lang ang pagiging masadya sa Paskwa ang nangin basehan kundi mangin ang paglantaw sang kada pamilya sa ila kaugalingon kung sila pigado ukon indi.
