ROXAS CITY – Ginkumpirmar sang Regional Head sang PhilHealth ang premium schedule ukon pagtaas sang kontribusyon sang mga myembro sa palaabuton nga bulan sang Hunyo sa idalum sang Universal Health Care (UHC) Law.
Sa interview sang Bombo Radyo kay Ms. Janimhe Cam Jalbuna, PhilHealth Regional Head, epektibo sa masunod nga bulan sang Hunyo, 4% na ang mangin kontribusyon sang kada miyembro nga may basic monthly income nga may minimum nga P10,000 below (padalom) kag magadugang sang 0.5% sa masunod nga tuig tubtob malab-ot ang 5% nga kontribusyon.
Sa mga self-employed nga miyembro 4% ukon P400 sa kada P10,000 below nga income ang mangin kontribusyon sa Philhealth kada bulan kag P1,200 naman kada tuig.
Kasubong man ini sang kontribusyon sa mga employed sa publiko kag pribado nga talapatan apang 50% sang kontribusyon sini ang paga-bayaran sang ila nga employer.
Dugang pa ni Jalbuna, nga naglab-ot na sa 88% ukon 395,187 ang mga myembro sang PhilHealth sa probinsya sang Capiz.
Ginaganyat man sini ang indi miyembro sang Philhealth nga magpa-miyembro na agud ma-avail sini ang mga benepisyo kasubong sang medical services ilabi na subong nga pandemya.
Kalakip sa mga benepisyo nga ginatan-ay sang talatapan amo ang libre nga COVID-19 testing, quarantine facility kalakip na ang mga bulong, kun ma-confine bangud sa COVID-19.
Mahibaluan nga may yara na sang automatic membership pananglitan ma confine ang isa ka pasyente kag may automatic availment of benefits man pananglitan mapatay ang isa ka miyembro.
