ROXAS CITY – Ginkumpirma sang isa ka pinay nga lima ka tuig nagapuyo sa Harmon Tamuning, Guam nga normal sa gihapon ang sitwasyon sa lugar sa pihak sang pamahog sang North Korea nga magalunsyar sang intermediate-range missile.
Apang gin-ako ni Maria Aurora Reyes sang Tondo, Manila nga nagapabilin ang nerbyos sa ila nga dughan samtang nagahilapit na ang ginatawag nga middle of the month, ang adlaw sa diin ginasiling magalunsyar sang missile ang NoKor sa Guam.
Bilang kabahin sang preparasyon, ginpahamtangan na nila sang shutter nga himo sa sansalon ang ila bintana para mangin luwas sila nga yara sa sulod sang balay.
Magluwas diri, nagtago man sila sang pagkaon kag tubig agud sa tion nga dayunon sang Nokor and ila pamahog indi sila magutuman.
Suno pa kay Reyes nga nagpahanumdum na ang gobernador sang Guam nga pahamtangan na sang shutter ang tanan nga bintana para sa ila nga kaluwasan.
Samtang nahibaluan ni Reyes gikan sa abyan nga nagatrabaho sa isa ka hotel nga apektado na bisan paano ang turismo sa Guam, bangud nagalab-ot sa 200 ka mga turista ang nagcheck out sa isa ka adlaw sa pagkabalaka sa ila nga kaluwasan.
