ROXAS CITY – Ginpanginwala sang pamunuan sang Capiz State Uiversity – Dumarao Campus ang pagkalakip sang nasambit nga unibersidad sa makabig isa sa mga recruitment grounds sang Communist Party of the Philippines – New People’s Army (CPP-NPA).
Suno kay Ms. Jezel Apocero, Chairperson sang Office of the Student Affairs (OSA) sang nasambit nga eskwelahan nga ginkakibot sini ang nangin pahayag sang anay miyembro sang CPP-NPA nga si Jeffrey “Ka Eric” Celiz nga isa ang nasambit nga unibersidad sa tatlo ka mga buluthuan sa probinsya sang Capiz nga nagapatigayon sang recruitment sa mga estudyante agud mangin miyembro sang rebelde nga grupo.
Suno kay Apocero nga wala sila sang may nabaton nga mga reklamo nga imbolbado ang mga estudyante sang amo nga eskwelahan sa nasambit nga butang.
Ginpasalig man sini ang seguridad sang mga kabataan kun sa diin wala sang dapat kabalak-an ang tagsa ka mga ginikanan.
Samtang, magapatigayon naman sa karon sang separado nga imbestigasyon ang pamunuan sang eskwelahan angut sa nasambit nga impormasyon.
