BANICA, ROXAS CITY – Padayon nga nagadamo ang ginapahayag nga mga pangayaw nga Street Vendors sa Barangay Banica, Roxas City.
Ini ang ginpahayag ni Punong Barangay Mike Xander Agrasada sang Barangay Banica sang mainterview sang Bombo Radyo.
Suno kay PB Agrasada, mas nagdamo subong ang mga pangayaw nga street vendors kung ikumparar sadtong tinalikdan nga tuig.
Dugang pa sini nga sumugod nga nagpungko ini sa pwesto, yara sa ila nga lugar ang mga manugbaligya apang magamay pa lamang ang mga ini kung ikumparar subong.
Mahibaluan nga kadam-an sa mga street vendors ang nagikan sa Brgy. Culajao sa sini man nga syudad kung sa diin bilang sabat nakig-angut ini sa Punong Barangay sa nasambit nga lugar agud mahatagan sang solusyon ang ginakabig nga isa sa mga ginaproblema kag ginareklamo sang mga pumuluyo.
Sa karon, ginsiling ni Agrasada nga magapadayon sa gihapon sila sang road clearing kag ang sin-o man nga indi luyag magsunod sa ila nga layi mahimo nga magapangatubang sa nagakaigo nga penalidad.
Panawagan sini sa mga vendors, nga kuntani magsunod kag magpamati na lamang sa ila kag indi nga pahugon ang mga Barangay Tanod sa ginahimo nga pagsita sa ila agud malikawan ang mga indi maayo nga insidente.
