Nagluntad ang panibag-o nga wildfire sa northern Los Angeles, California sini nga Miyerkules sang aga, oras sa Amerika.
Ang panibag-o nga wildfire ang gintawag nga Hughes Fire nga nagluntad sa area sang lake Hughes Road malapit sa Lake Castaic, 40 miles gikan sa Eaton kag Palisades wildfires nga naghalit sa parte sang LA sa una nga bahin sang Enero.
Sa sulod sang pila ka oras, madasig nga naglapta ang kalayo nga suno sa California Department of Forestry and Fire Protection, yara na sa 9,400 ka ektarya ang natupok.
Bangud sini, nag-isyu na sang mandatory evcuations kag warnings bangud sa madasig nga paglapta sang kalayo.
Sa isa ka news conference, gin-report sang Los Angeles County officials nga masobra 31,000 ka persona nga mas mataas pa sa numero sang kabug-usan nga populasyon sang Castaic ang ginmanduan nga magbakwit matapos gin-isyu ang warnings bangud sa “immediate threat to life” sang wildfire.
25,000 ka tawo naman ang yara sa zones nga ginpaidalom sa evacuation warnings.
Ginpasangkad naman ang ginahimo nga pagpalong sa mga nasunog nga kabukiran pinaagi sa pagsabya sang tubig kag fire suppressants gikan sa plane.
