Nagpatigayon sang humanitarian relief operation sa mga naapektuhan sang baha ang Panitan Municipal Police Station.
Sa interview sang Bombo Radyo kay Police Captain Merry Chris Dela Cruz, officer-in-charge Chief Of Police sang Panitan Municipal Police Station, iya ginpahayag nga bug-os ang pwersa sang ila istasyon sa pagbulig sa pagrescue sa mga na-stranded nga tawo kag sa pagpatabuk sa madalum nga baha ilabi na ang mga bata kag katigulangan.
Suno kay Police Captain Dela Cruz, kaupod man nila ang mga katapo sang 603rd Capiz Community Defense Center sang Philippine Army, local government unit sang Panitan, Department of Public Works and Highways (DPWH) kag Municipal Risk Reduction and Management Office (MDRRMO)-Panitan.
Pahayag pa niya, madasig ang nangin pagnubo sang lebel sang tubig sa mga dalanon apisar nag-high tide.
Sa subong, passable naman ang pila ka mga alagyan apang kinahanglan gid sang paghalong bangud may yara gihapon sang nabilin nga tubig sa dalanon.
Dugang pa sang natungdan, padayon ang pagmonitor sang kapulisan sa sitwasyon sang bug-os nga banwa kag handa nga magbulig sa oras sang emerhensya.
