ROXAS CITY – Ginpahayag sang 34-anyos nga mister nga nagkaon sang buhi nga mga manok, sa Barangay Cagay, sini nga syudad, nga nakagamit ini sang iligal nga droga, apang gilayon man sini nga ginbawi ang amu nga pahayag.
Sa interview sang Bombo Radyo kay ‘Papet’ ginsiling sini nga wala niya matandaan nga nagkaon ini sang buhi nga manok, bangud busog man ini, apang suno diri nga ‘naka-shabu’ ini kag nakainom sang makahulubog nga ilimnon.
Apang, sang liwat nga pamangkuton sang Bombo Patrol team, ginsiling ni ‘Papet’ nga wala siya nagagamit sang iligal nga droga kag wala sang rekord sa ila barangay, sa baylo, nagapati ini sa ginpahayag sang seruhano nga ginhalitan ini sang malain nga espiritu bangud sa pagtapas sang dako nga kahoy sang santol sa ginatrabahuan niya nga manokan, sa Sitio Lubog, Brgy. Damayan, banwa sang Sapian.
Maayo man suno diri ang iya trabaho sa Sapian kag wala nagutuman.
Sa pahayag naman sang amay ni ‘Papet’ nga wala nagagamit sang iligal nga droga ang iya bata kag wala sang rekord sa ila barangay, apang indi man nila maintindihan kun ngaman nahimo sini nga magkaon sang buhi nga manok.
Dugang pa sini, nga nagabulag-bulag ang iya anak kag ang live-in partner sini, apang nangin maayo man suno diri ang ila pagbulagay kag may yara naman nga ginaupod nga babayi si ‘Papet’ didto sa Sapian, nga taga-Iloilo.
Ginapatihan nalang nila sa karon nga ginhalitan si ‘Papet’ sang malain nga espiritu bangud sa pagtapas sang kahoy sa ginatrabahuan nga manokan.
Sa karon, nagapabilin si ‘Papet’ sa ika-duha nga panalgan sang daan nga barangay hall, sa barangay Cagay para sa nagakaigo nga disposisyon.
